Buka me çmim të njëjtë
Prishtinë, 27 korrik - Qytetarët e Kosovës edhe për një muaj do të mund të blejnë bukë me çmimin siç e kanë blerë deri më tani. Por, ende nuk dihet se si do të sillen çmimet në muajt në vijim.
Sylejman Deshishku nga Fabrika e Bukës “Kualiteti” ka deklaruar se për momentin nuk do të ketë ngritje të çmimit të bukës. “Çmimin e bukës e dikton çmimi i miellit.
Nëse do të ketë ngritje të çmimit të miellit atëherë edhe çmimi i bukës do të ndryshojë. Sidoqoftë, nuk e besoj se mund të ndodhë kjo”, ka pohuar Deshishku. Sipas tij, çmimet varen edhe nga lëvizjet në tregjet rajonale dhe në berëzat ndërkombëtare.
Por, Shefki Ostërgllava nga Shoqata e Furrtarëve ka deklaruar se çmimi i miellit është ngritur për 6 centë, e çmimi i bukës mund të ngrihet deri në 50 centë. “Sipas të dhënave të çmimit të grurit dhe miellit dhe sipas statistikave të tjera, sigurisht se deri në fund të vitit çmimi i bukës mund të ngrihet deri në 50 centë”, ka deklaruar Ostërgllava.
Ai i ka kritikuar institucionet për shkak se, sipas tij, nuk kanë arritur ta rregullojnë çmimin e tregut për miell. “Në Kosovë nuk ka rregulla. Çmimi i miellit rritet pa kontroll. Kështu nuk është as në Shqipëri e as në Serbi. Pra, jemi mbrapa në rregullimin ligjor”, ka thënë ai.
Të dhënat e Ministrisë së Bujqësisë, Pylltarisë dhe Zhvillimit Rural tregojnë se Kosova në këtë vit i plotëson nevojat me grurë për 70 deri në 75 për qind, ndërsa pjesa tjetër do të varet nga importi. Mesatarja e rendimenteve për hektar është 4 200 kilogramë. Rendimente të ulëta të grurit janë shënuar edhe në Shtetet e Bashkuara të Amerikës dhe në Francë. Si pasojë e kësaj, ka pasur edhe ngritje të çmimit të miellit në këto dy vende.(Epoka e re)
