Prishtinë, 18 nëntor - Ministri i Bujqësisë, Pylltarisë dhe Zhvillimit Rural, Memli Krasniqi ka takuar sot  menaxherin e Bankës Botërore (BB) për Kosovë, Jan-Peter Olters, Raymond Bourdeaux, Udhëheqës i programit për rritje të qëndrueshme në Bankën Botërore, si dhe Meeta Seghal, udhëheqëse e projektit të Bankës Botërore për Bujqësi dhe Zhvillim Rural në Kosovë.

Ministri Krasniqi falënderoi Bankën Botërore për mbështetjen që kanë dhënë deri me tash në sektorin e bujqësisë, duke e vlerësuar se ka sjellë rezultate mjaft konkrete dhe të rëndësishme.

Ai vlerësoi lartë takimet që kishte në Bankën Botërore në Uashington, me udhëheqës dhe ekspertë të bujqësisë. Ministri shtoi se me udhëheqësit dhe ekspertët e Bankës Botërore në Uashington janë pajtuar që të ndërmarrin hapa konkret për avancimin e sektorit të bujqësisë në Kosovë.

Në këtë takim, ministri Krasniqi dhe zyrtarë e BB-së diskutuan për mundësitë e bashkëpunimit të mëtutjeshëm në kuadër të projektit për bujqësi.

Ministri Krasniqi kërkoi që mbështetja të rritet dhe zgjerohet në masa të reja mbështetëse në dobi të fermerëve tanë.

Nga ana tjetër, zyrtarët e Bankës Botërore shprehen gatishmërinë për të vazhduar mbështetjen, dhe e vlerësuan të arriturat në këtë sektor, duke shtuar se është një nga mundësitë më të mira për punësim dhe zhvillim ekonomik.