Vjenë, 2 dhjetor - Sekretari i përgjithshëm i Organizatës për Siguri dhe Bashkëpunim në Evropë, Lamberto Zannier, e ka mirëpritur votimin paqësor dhe të rregullt në zgjedhjet komunale në Kosovë, si një “hap të rëndësishëm drejt besimit dhe sigurisë”.

Këto komente ai i bëri pas mbylljes së votimeve në rundin e dytë të zgjedhjeve, që u mbajtën dje.

“Ky është një moment shumë i rëndësishëm në procesin kompleks, duke ndërtuar besimin dhe duke hapur perspektiva për stabilitetin dhe për një të ardhme zhvilluese për popullin e këtij rajoni”, -ka thënë Zannier.

Më tej ai ka theksuar se OSBE-ja “mbetet e gatshme për t’u angazhuar në mbështetje të këtij dialogu të rëndësishëm, i udhëhequr nga BE-ja, ashtu sikundër do të mbështesë dhe implementimin e tij”.

Shefi i OSBE-së ka shfaqur kënaqësi për angazhimin konstruktiv nga të gjitha palët, gjatë negociatave komplekse dhe intensive për zhvillimin e zgjedhjeve, si dhe ka falënderuar policinë e Kosovës, misionin EULEX dhe KFOR-in, për krijimin e ambientit të sigurt për zgjedhjet në pjesën veriore të Kosovës.