Berlin, 27 janar - Ambasadori i Republikës së Kosovës në Gjermani, Skënder Xhakaliu, ka marrë pjesë në pritjen e zhvilluar me rastin e vitit të ri që organizohet në muajin janar nga presidenti Joachim Gauck dhe ministri i Punëve të Jashtme Frank-Walter Steinmeier, ku kanë marrë pjesë ambasadorë të shteteve të akredituar në Berlin.

Ambasadori Xhakaliu po ashtu ka pasur takime personale me presidentin Gauck dhe ministrin e Jashtëm, Steinmeier.

Gjatë takimeve, ambasadori i Kosovës në Gjermani u ka shprehur presidentit dhe ministrit të Jashtëm gjerman, falënderimet e Qeverisë dhe qytetarëve të Kosovës për ndihmën dhe përkrahjen që Gjermania është duke i dhënë Kosovës, ndërkaq që presidentit Gauck i ka bërë ftesë që ta vizitojë Kosovën.

Ambasadori Xhakaliu i ka uruar ministrit Steinmeier detyrën e re dhe vullnetin e plotë për bashkëpunim të mëtutjeshëm.

Gjatë pjesëmarrjes në pritjen ceremoniale, ambasadori i Kosovës në Gjermani, Skënder Xhakaliu, ka zhvilluar takime edhe me shumë ambasadorë të vendeve të ndryshme, duke përfshirë edhe ambasadorë të shteteve nga Afrika, Amerika Latine, Azia dhe vendet arabe.