Thaçi, Veseli e Mustafa në ceremoninë e shenjtërimit të Nënës Terezë
Kryekuvendari Veseli sonte do të marrë pjesë në ceremoninë e kanonizimit të Nënës Terezë, ndërsa gjatë ditës së nesërme merr pjesë në ceremoninë zyrtare të shenjtërimit të Nënës Terezë, e cila do të mbahet në Selinë e Shenjtë, në Vatikan.
Për nder të humanistës shqiptare, sonte në Selinë e Shenjtë do të mbahet edhe koncerti “Himni i Nënës Terezë”, ku do të marrin pjesë artistë të njohur botërorë.
Ndër solistët e njohur që do të përformojnë në këtë koncert janë edhe dy artistet shqiptare, Rita Ora dhe Inva Mula. Kurse futbollisti shqiptar, Lorik Cana, do të recitojë poezinë e “Nënës Terezë”.
Ceremonia e shenjtërimit të Nënës Terezë do të mbahet nesër dhe pjesë e saj do të jenë rreth 100 mijë besimtarë, si dhe liderë e personalitete të shumta botërore.
Pas ceremonisë së shenjtërimit, presidenti Thaçi në mbrëmje do të jetë i pranishëm edhe në pritjen e organizuar nga Ambasada e Republikës së Kosovës në Romë.
E dekoruar me çmimin Nobel për Paqe më 1979, Nënë Tereza u lumturua nga Papa Gjon Pali më 2003, pasi që Selia e Shenjtë kishte pranuar se falë ndërhyrjes së mbinatyrshme të saj, Nënë Tereza kishte shëruar një grua indiane.
Më 17 dhjetor 2015, Papa Françesku ia njohu Nënës Terezë edhe mrekullinë e dytë, gjegjësisht shërimin e jashtëzakonshëm të një të riu brazilian, që ka ndodhur më 9 dhjetor 2008.
Njohja e mrekullisë së dytë nga Selia e Shenjtë i hapi rrugë shenjtërimit të humanistes shqiptare.
Ndërkaq, nesër, presidenti Thaçi, kyreparlamentari Veseli dhe kryeministri Mustafa do të marrin pjesë në ceremoninë zyrtare të shenjtërimit të Nënës Terezë, e cila do të mbahet në Selinë e Shenjtë.
