Beograd, 26 tetor - Shefi i delegacionit serb në bisedimet me Kosovën, Borislav Stefanovic, u ka thënë opozitarëve në Serbi dhe atyre në veriun e Kosovës, se kërkesat e tyre “jorealiste” do të thellonin krizën ndërmjet KFOR-it dhe protestuesve serbë, lidhur më barrikadat në veri.
 
Kryenegociatori serb tha për të përditshmen serbe, “Vecernje Novosti”, që “rezultati më i keq” për Serbinë dhe serbët e Kosovës, është nëse përfaqësuesit e katër komunave serbe në veri të Kosovës “nuk u binden vendimeve politike të Beogradit”.

Stefanovic ka shtuar se përçarjet e mëtejshme në veri të Kosovës, do të jenë vetëm në favor të Prishtinës dhe do të përplasin kërkesat “jorealiste” të opozitës serbe për të ndërprerë bisedimet e ndërmjetësuara nga Bashkimi Evropian, ta cilat janë jetike për Beogradin për të siguruar statusin e kandidatit për anëtarësim në BE gjatë këtij viti.

Bllokimi i rrugëve në veri të Kosovës është iniciuar dhe përkrahur jo vetëm nga opozita në Serbi, por deri tani është mbështetur edhe nga qeveria dhe presidenti serb, Boris Tadic.