SHBA shpall përfundimin e tërheqjes nga Afganistani
Major Gjeneral Chris Donahue është ushtari i fundit amerikan që është larguar nga Kabuli, duke i dhënë fund prezencës amerikane në Afganistan. Fotoja e tij është shpërndarë nga llogaritë zyrtare të shtetit amerikan.
Gjenerali Frank McKenzie, kreu i Komandës Qendrore të SHBA-së konfirmoi përfundimin e tërheqjes dhe përpjekjeve ushtarake për të evakuuar amerikanët dhe afganët në rrezik nga vendi i shkatërruar nga lufta.
"Ndërsa evakuimi ushtarak përfundoi, misioni diplomatik për të siguruar shtetasit e tjerë amerikanë dhe afganët e kualifikuar që duan të largohen vazhdon", u tha ai gazetarëve.
"Tërheqja e sotme nënkupton fundin e komponentit ushtarak të evakuimit, por edhe fundin e misionit gati 20-vjeçar që filloi menjëherë pas 11 shtatorit 2001", theksoi McKenzie.
Ai shpjegoi se gjatë misionit, më shumë se 2.460 ushtarë dhe civilë amerikanë u vranë, dhe më shumë se 20.000 prej tyre u plagosën, përfshirë 13 ushtarë të cilët u vranë në sulmin e fundit nga sulmuesit vetëvrasës të ISIS-K pranë aeroportit në Kabul.
