Washington, 20 dhjetor - Analisti i njohur amerikan, Daniel Serwer ka thënë se politika e Serbisë, “edhe Bashkimi Evropian edhe Kosova nuk është reale”.

Sipas tij, Serbia me insistimin e saj për sovranitet mbi Kosovën, nuk do të hyjë në BE, duke shtuar se këtë e kanë bërë me dije qartë edhe shumë shtete anëtare të BE-së.

Serwer, duke folur për pengesat me të cilat Serbia përballet aktualisht në rrugën drejt BE-së, në një intervistë për shërbimin serb të “Zërit të Amerikës”, ka thënë se “pengesa e drejtpërdrejtë është situata në veri të Kosovës”, e cila sipas tij, duhet të zgjidhet para se Serbia të marrë statusin e kandidatit.

Po ashtu ai theksoi se “ka edhe shumë çështje që Serbia duhet të zbatojë në vepra”, si vendosja e marrëdhënieve të mira me Kosovën fqinje.

“Pra Serbia duhet të zgjidhë çështjen e veriut të Kosovës sot, ndërsa në të ardhmen edhe çështjen e tërë Kosovës”, është shprehur Serwer, transmetojnë mediat.

Sa i përket idesë që çështja e statusit të Kosovës të zgjidhet në një konferencë ndërkombëtare, Serwer thotë se “ka një problem me atë ide”, duke shtuar se statusi i Kosovës tashmë është zgjidhur për 85 vende, që e njohin, e pritet që ndoshta 100 vende ta njohin në fillim të vitit të ardhshëm.

Madje, thotë Serwer, edhe vendet të cilat nuk e njohin Kosovën nuk e mohojnë që ajo do të mbetet sovrane dhe e pavarur.

“Pra çështja nuk është pavarësia e Kosovës, por si të dalë Serbia nga kutia e izoluar diplomatike në të cilën është mbërthyer”, thotë Serwer.