Beograd, 20 dhjetor - Zëvendëskryetari i Partisë Radikale serbe, Nemanja Saroviq është arrestuar me urdhrin e Prokurorisë së lartë në Beograd dhe po pret të merret në pyetje në pallatin e Drejtësisë, për shkak të padisë penale të bërë kundër tij për arsye të djegies së flamurit të “Republikës së Kosovës”, njoftoi partia e tij.
 
Padia kundër Saroviqit është bërë për shkak të djegies së flamurit të Kosovës në protestën që partia e tij organizoi në muajin prill, me rastin e nënshkrimit të marrëveshjes së Brukselit ndërmjet Daçiq dhe Thaçit.

Partia e tij ka reaguar ashpër dhe e ka quajtur këtë akt politik tradhtie të regjimit kundër radikalëve serbë. “Radikalët serbë nuk do të ndalen të luftojnë kundër kësaj politike tradhtare dhe rrugës humbëse drejt BE-së, në të cilën po na shtyjnë me çmimin e shkatërrimit të Serbisë”, thuhet në kumtesën e Partisë Radikale.