Moskë, 19 dhjetor - Presidenti i Rusisë Vladimir Putin, ka mbajtur konferencë për shtyp, e cila zgjati katër orë. Gjatë kësaj kohe ai iu përgjigj dhjetëra pyetjeve të gazetarëve të medieve ruse dhe të huaja.

Presidenti rus ka folur për shumë tema, si ulja e çmimeve të gazit për Ukrainën, për situatën ekonomike, mbi amnistinë si dhe problemet aktuale ndërkombëtare, por edhe për Snoudenit.

\"Unë personalisht nuk e njoh Snouden dhe nuk jam takuar kurrë me të\", ka thënë presidenti rus Vladimir Putin duke iu përgjigjur pyetjes, e cila iu drejtua atij, në lidhje me ish-agjentin e CIA-s, Eduard Snouden, gjatë konferencës së madhe për shtyp në Moskë.

\"Ai ka idetë e tij, përfytyrimin e vet për jetën dhe unë nuk e fsheh aspak se Snouden është një person mjaft interesant për mua. Unë mendoj se ai ka arritur të ndryshojë shumë gjëra në mendjet e politikanëve perëndimorë. Ai është i ri, njeri kurioz.

Ai ka punët e tij, unë kam të mijat. Ne i dhamë atij mundësinë për të jetuar njëfarë kohe në vendin tonë, por nuk duam të angazhohemi në propagandën antiamerikane. Në planin operativ ne nuk punojmë me të dhe nuk kemi punuar kurrë\", ka theksuar Putin.