Prishtinë, 10 nëntor - Përfaqësuesi Civil Ndërkombëtar (ICR) Pieter Feith e dënoi të enjten incidentin e dhunshëm në Kroin e Vitakut i cili ndodhi të mërkurën mbrëma, në të cilin disa persona u plagosën dhe një person e humbi jetën.

Vdekja e një personi është tragjedi për familjen e tij dhe komunitetin, por në çfarëdo rrethane, sipas Feith ky incident nuk duhet lejuar që të shfrytëzohet si pretekst për të ngritur tensionin dhe frikën në rajon.

“U bëj thirrje të gjithë njerëzve në komunitet që të bashkëpunojnë me Policinë e Kosovës dhe t’ia mundësojë asaj kryerjen e hetimeve sa më efikase që të jetë e mundur."

"Kjo është mënyra e vetme për ta zgjidhur këtë incident pa vonesë dhe për të sjellë drejtësinë për ata që kanë marrë plagë dhe për vdekjen e një anëtari të familjes”, ka thënë Feith.