Paris, 12 tetor - Deputetët e Parlamentit francez miratuan ratifikimin e Paktit buxhetor të BE-së. Franca u bë vendi i 13-të i BE-së që ratifikon dokumentin në fjalë.

Më 2 mars atë e nënshkruan në Bruksel krerët e shteteve dhe qeverive të 25 nga 27 vendet e BE-së. Marrëveshjes nuk iu bashkuan Britania e Madhe dhe Çekia.

Pakti buxhetor i BE-së, i hartuar me iniciativën e Francës dhe Gjermanisë, pritet të hedhë një themel të fortë të tregjeve financiare e bankare të eurozonës dhe gjithë BE-së në mënyrë që në të ardhmen të shmanget përsëritja e krizës së borxhit aktual.

Pakti vendos kushte të reja dhe më të ashpra të disiplinës buxhetore. Ai duhet të hyjë zyrtarisht në fuqi më 1 janar të vitit 2013.