Prishtinë, 20 maj - Pas përfundimit të takimit të përbashkët Parlamenti Evropian – Kosova, u mbajt një konferencë e përbashkët për media e kryetarit të Kuvendit të Kosovës, dr. Jakup Krasniqi dhe kryetarit të  Parlamentit Evropian, Eduard Kukan, i cili udhëheq delegacionin e PE-së. Kryekuvendari Krasniqi duke njoftuar mediat se sot ka përfunduar punimet Takimi i Katërt vjetor - Parlamenti Evropian–Kosova, shprehu kënaqësinë për përmbajtjen e takimit, për përfundimet që u nxorën dhe për deklaratën e përbashkët që u miratua.

”Për dy ditë rresht ne kemi trajtuar  tema të rëndësishme  për zhvillimet aktuale  nëpër të cilat po kalon Kosova, si: integrimi evropian,reformat institucionale,decentralizimi, sistemi arsimor, sundimi i ligjit dhe lufta kundër krimit të organizuar e korrupsionit; perspektiva ekonomike e sociale, bashkëpunimi rajonal dhe dialogu  me Serbinë etj. Parlamentarët evropianë  dhe diskutuesit vendorë  dhanë kontribute të çmueshme  në shqyrtimin e agjendës së ngjeshur”, theksoi kreu i legjislativit të vendit.

Ky takim, tha z. Krasniqi, rikonfirmoi  edhe njëherë  marrëdhëniet e  shkëlqyera  me Parlamentin Evropian, qëndrimin e qartë dhe të avancuar që ka ai ndaj shtetit të Kosovës dhe për mbështetjen   e pakursyer që Bashkimi Evropian po vazhdon t’ i japë Kosovës.

Kryekuvendari Krasniqi falënderoi mbarë delegacionin parlamentar evropian, ndërsa në mënyrë të veçantë Kukan, për qëndrimet e tyre mbështetëse  dhe për kontributin e çmuar që dhanë. Krasniqi shprehu besimin se konkluzionet e arritura  do të trajtohen seriozisht nga faktorët që ato iu adresohen.

Kryetari i Parlamentit Evropian, Eduard Kukan, në fillim theksoi se në këtë takim pati diskutime shumë të mira,  të shoqëruara nga besimi i ndërsjellë dhe klima shumë e mirë që u krijua ndërmjet dy delegacioneve.

Parlamenti Evropian mbështet të ardhmen evropiane të Kosovës, ndaj në këtë frymë u theksua nevoja që Bashkimi Evropian të trasojë rrugën dhe të përcaktojë kushtet për fillimin e dialogut  për liberalizimin e vizave.

Në këtë frymë rëndësi shumë të madhe ka nisja e reformave, në bazë të të cilave do të krijohej një jetë më e mirë për qytetarët, siç është ulja e papunësisë, si dhe zgjidhja e problemeve të tjera jetësore për popullin e Kosovës, sepse kjo është detyrë e politikanëve, pra t’ iu shërbejnë qytetarëve të tyre, dhe kjo duhet të kihet gjithnjë para sysh kur flitet për liberalizimin e vizave, reformën zgjedhore, luftën kundër korrupsionit dhe për të gjitha çështjet tjera.

Kukan shprehu kënaqësinë për gatishmërinë e treguar nga ana e përfaqësuesve vendorë për vazhdimin e këtyre reformave.

”Nga Kosova po largohemi me një ndjenjë të mirë, kishim  një takim shumë të dobishëm e  të frytshëm, i cili do të japë rezultate”, theksoi kryetari i  Parlamentit Evropian, Eduard Kukan.