Manila, 18 nëntor - Autoritetet në Filipine bëjnë të ditur se tani numri i të vdekurve nga tajfuni \"Haiyan\" ka shkuar në afro katër mijë.

Deri të dielën në mesditë, numri zyrtar i atyre që kanë humbur jetën nga ky tajfun arriti në 3 974 veta. Ndërkohë, rreth 12 mijë të tjerë konsiderohen ende të zhdukur.

Shifrat e reja publikohen teksa zyrtarët dhe organizatat e ndihmave vazhdojnë të ndihmojnë në ushqimin dhe strehimin e dhjetëra mijë të zhvendosurve.

Supertajfuni \"Haiyan\" goditi pjesën qendrore të Filipineve të premten e kaluar, duke sjellë shkatërrime në mbarë rajonin e duke rrafshuar një pjesë të madhe të qytetit Takloban.

Stuhia masive goditi edhe fshatra të vogla në të gjithë pjesën qendrore të vendit para se të zhvendosej në Kinën Jugore.