Bruksel, 25 qershor - Kryeministri i Republikës së Kosovës, Isa Mustafa, po merr pjesë sot në punimet e Samitit të kryetarëve të shteteve dhe të qeverive të Bashkimit Evropian, pjesëtarë të grupit të Partive Popullore Evropiane (EPP), që po zhvillohet në Bruksel.

Kryetarët e shteteve dhe të qeverive dhe liderët e opozitës, anëtarë të Partisë Popullore Evropiane (EPP), së bashku me kryetarët e Këshillit Evropian dhe Komisionit Evropian, Donald Tusk dhe Jean-Claude Juncker, do të marrin pjesë në këtë Samit të EPP-së, i cili zhvillohet në Bruksel. Në rendin e ditës do të jetë përgatitja e Këshillit Evropian, i cili do të mbahet më 25 dhe 26 qershor.

Presidenti i EPP-së, Joseph Daul do të udhëheq punimet e këtij Samiti, ndërsa aty do të jenë edhe  kryetari i Grupit Parlamentar i EPP-së në Parlamentin Evropian, Manfred Weber, sekretari i përgjithshëm i EPP-së, Antonio López-Isturiz dhe anëtarët e Kryesisë të EPP-së.

Krahas kryeministrit Mustafa, në Samitin e zgjeruar të grupit më të madh të partive në Parlamentin Evropian do të jenë të pranishëm edhe liderët e vendeve anëtare të Bashkimit Evropian, si kancelarja gjermane Angela Merkel, Mariano Rajoy, Viktor Orban, Nicolas Sarkozy dhe krerë të tjerë të partive të djathta evropiane.

Kryeministri Isa Mustafa do të zhvillojë takime bilaterale me kryeministrat dhe liderët e partive të djathta evropiane, të cilët do t’i informoj me zhvillimet e fundit në Kosovë.  Kryeministri Mustafa gjithashtu do të shfrytëzoj edhe këtë mundësi për të kërkuar nga homologët e tij përshpejtimin e procedurave për liberalizimin e vizave me qëllim që qytetarët e Kosovës sa më shpejt të kenë mundësinë e qarkullimit të lirë në BE.

Gjithashtu, kryeministri Mustafa do t’i informoj të pranishmit me planin qeveritar te Qeverisë Mustafa si dhe do të flet për zhvillimet në fushën e ekonomisë dhe angazhimet e Qeverisë në zhvillimin e kësaj fushe jetike për të ardhmen e vendit.