Prishtinë, 28 prill - Kryeministri Albin Kurti ka njoftuar se në Bruksel, ku po qëndron për vizitë dyditore është takuar me kryeministrin e Belgjikës, Alexander de Croo.

Kurti gjatë takimit me homologun e tij Belg, ndër të tjera ka kërkuar liberalizimin e vizave për Kosovën.

“Fillova vizitën time dy ditore në Bruksel, shtëpinë e institucioneve evropiane me takimin bilateral me kryeministrin e Belgjikës, Alexander De Croo. Ndava me të prioritetet për vendet e punës dhe drejtësinë, angazhimin tonë për BE-në dhe urgjencën e liberalizimit të vizave. Ne u pajtuam që të rrisim bashkëpunimin ekonomik”, ka shkruar Kurti.  

Njoftohet se u bisedua për vaksinat kundër COVID-19, angazhimin e Qeverisë së Kosovës për sigurimin e tyre dhe mundësitë e mbështetjes së Belgjikës në këtë synim.

Kurti ka paralajmëruar se do të takohet me presidentin e Parlamentit Evropian, David Sassoli dhe presidenten e Komisionit Evropian, Ursula von der Leyen. Gjithashtu do të takohet edhe me shefin e diplomacisë evropiane, Josep Borrell.