Prishtinë, 11 qershor - Kosova është anëtarësuar sot në Komisionin e Venedikut, njërin prej institucioneve të rëndësishme të Këshillit të Evropës, një vit pas anëtarësimit në Bankën Zhvillimore, duke e dërguar në dy numrin e institucioneve të Këshillit të Evropës që Kosova anëtarësohet brenda një viti.

35 shtete kanë votuar pro anëtarësimit që shënon edhe hapin final drejt aplikimit për anëtarësim të Kosovës në Këshillin e Evropës.

Ministri i Jashtëm Enver Hoxhaj duke përshëndetur anëtarësimin në këtë organizatë dhe falënderuar të gjitha vendet për përkrahjen ka thënë se ky anëtarësim përbën forcim dhe ngritje të Kosovës në rrafshin ndërkombëtar.

“I falënderoj të gjitha shtetet mike e veçmas homologët e mi me të cilët gjatë këtyre javëve kemi komunikuar dhe koordinuar hapat e aplikimit dhe anëtarësimit të Kosovës në Komisionin e Venedikut.\"

\"Ky është një hap i rëndësishëm për Kosovën drejt anëtarësimit në Këshillin e Evropës si një prej institucioneve kyçe panevropiane drejt integrimit të plotë të Kosovës në Bashkimin Evropian.\"

\"Me këtë anëtarësim, Kosova do të përfitoj drejtpërdrejt në rrafshin e forcimit të mëtejshëm të demokracisë, reformave kushtetuese dhe zgjedhore”, ka thënë Hoxhaj, i cili disa herë ka qëndruar për lobim në Strasburg dhe koordinuar hapat me vendet mike.

Kryediplomati kosovar ka falënderuar edhe shoqërinë civile në Kosovë për kontributin e tyre në avancimin e shtetit tonë në raport me Këshillin e Evropës. 

Ky Komision është organ këshillimor i Këshillit të Evropës për shumë çështje veçmas kushtetuese dhe zgjedhore.

Misioni i Komisionit të Venecias të Këshillit të Evropës është që të sigurojë këshilla ligjore për shtetet anëtare të saj dhe në veçanti, për të ndihmuar ata që dëshirojnë të bëjnë strukturat e tyre ligjore dhe institucionale në përputhje me standardet dhe përvojën ndërkombëtare mbi demokracinë, të drejtat e njeriut dhe sundimin e ligjit.

Komisioni i krijuar në vitin 1990 përbëhet nga 59 vende anëtare: 47 Shtete vendet anëtare të Këshillit të Evropës janë anëtarë të Komisionit të Venecias, si dhe 12 vende anëtare të tjera. Tani e tutje me Kosovën do të ketë 60 vende anëtare.