Koshtunica: Të pengohet vendosja e kufirit me Kosovën
Në një intervistë për gazetën e sotme “Danas” të Beogradit, Koshtunica, ka thënë se”angazhohem fuqimisht që Serbia t’i drejtojë kërkesë Këshillit të Sigurimit të KB që të ndërpriten negociatat nën mbikëqyrjen e Brukselit dhe ato të kthehen nën mandatin e plotë të KS, sepse ashtu është përcaktuar edhe me Rezolutën 1244”.
Duke cekur se kufiri është “në çdo kuptim çështje e të gjitha çështjeve” dhe këtij pushteti “i ka rënë barra të bartet më ate”, Koshtunica ka thënë se në qoftë se pushteti e vendos kufirin me Kosovën, atëherë nuk nevojitet kurrfarë platforme.
Koshtunica ka rikujtuar se partia e tij ka parashtruar kërkesë për vlerësimin e kushtetutshmërisë së të gjitha dekreteve që dalin nga marrëveshjet e Brukselit, përfshirë edhe atë mbi menaxhimin e integruar të vendkalimeve, dhe ka cekur se në Gjykatën Kushtetuese tani është “përgjegjësia më e madhe, respektivisht historike”.
Sa i përket vendimit të Gjykatës së Hagës për ta liruar Ramush Haradinajn, Koshtunica ka thënë se në vepër është “atakimi gjithëpërfshirës dhe i menduar mirë i fuqive të mëdha ndaj Serbisë”.
“Serbia është rrezikuar, është rrezikuar territori i saj, identiteti i saj, rendi i saj kushtetues, ekonomia dhe vertikale e saj morale mbi të cilën mbështetet”, ka theksuar ai.
Në pyetjen se si do të mund të definohej nga aspekti juridik “procesi i normalizimit të raporteve” të një shteti me autoritetet e vetëshpallura të pjesës së territorit të saj, Koshtunica ka thënë se përgjigjen në këtë e ka dhënë para do kohësh një diplomat i rëndësishëm perëndimor” - ”normalizimi i marrëdhënieve ndërmjet Prishtinës e Beogradit ka për qëllim të mundësojë njohjen e përgjithshme të pavarësisë së Kosovës”.
Me këtë, siç ka thënë Koshtunica, ”normalizimi i marrëdhënieve me separatistët nënkupton edhe minimin direkt të Kushtetutës së Serbisë dhe rrezikimin e interesave tona kombëtare e shtetërore”.
/rtk/
