Bruksel, 7 maj - Organizata prestigjioze kundër Transparency International (TI) lëshoi kohët e fundit raportin e parë mbi Bashkimin Evropian dhe institucionet e tij, si Parlamenti Evropian dhe të tjera, ku vihet në dukje se BE ka një sërë të metash.

Kjo është hera e parë që Transparency International shqyrton Bashkimin Evropian. Dhe sipas autorit të studimit Mark Perara institucionet e BE-së kanë të meta të dukshme.

“Sistemi ka një sërë të metash, siç është vendim-marrja jotransparente e BE-së,  si dhe mungesa e transparencës për lobizmin brenda BE-së. Po ashtu duhet të përmirësohet mënyra se si menaxhohen konfliktet e interesit për zyrtarët e lartë të BE-së.  Sistemi, nga ana tjetër, nuk ofron mbrojtje të mjaftueshme për ata që kritikojnë nga brenda  institucionet e BE-së. Për ne kjo është diçka jetike për identifikimin e korrupsionit.  Dhe, ne gjithashtu pamë se masat ndëshkimore për kompanitë e korruptuara janë të dobëta.”

Një nga format më të përhapura të korrupsionit është përmes lobizmit – përmes ndikimit nga jashtë të zyrtarëve dhe deputetëve.  Raporti thekson se rregullat, mbi të cilat bazohet veprimtaria e grupeve  lobiste ndaj zyrtarëve të BE-së, janë shumë të dobëta.
 
Jakob Kirkegaard, me Institutin Peterson për Ekonominë Ndërkombëtare është dakort me këtë konstatim.  

“Është absolutisht e domosdoshme që të ketë rregulla të forta për një institucion si BE-ja, i cili është përgjegjës për shumë ligje për gjithë Evropën. Një situatë e tillë ku të mungojë njohja e fuqisë lobiste dhe lidhja e lobistëve me ligjbërësit,  mendoj se duhet të jetë e papranueshme për çdo vend demokratik.”

Udhëheqësit dhe ligjvënësit e shumë vendeve janë të detyruar me ligj të bëjnë të njohura pasuritë e tyre, interesat dhe investimet, në mënyrë që qytetarët të binden  se vendimet nuk janë bërë në konflikt me interesat e publikut. Zoti Perara thotë se ky është një tjetër problem për BE-në:

“Besojmë se anëtarët e Parlamentit  Evropian dhe të Komisionit Evropian e kanë për detyrë të deklarojnë interesat e tyre financiare. Megjithatë, ne vumë re se nuk kishte prova që sugjerojnë se deklaratat e tyre financiare janë duke u verifikuar në mënyrë sistematike dhe gjithëpërfshirëse.”

Zoti Kirkegaard i Institutit Peterson thotë se ka gjasa të jetë e vështirë për BE-në për të forcuar ligjet dhe procedurat kundër korrupsionit.

“Për të gjetur një zgjidhje reale për këtë duhet të rishikohet dhe të reformohet i ashtuquajturi traktati i BE-së, i cili është një proces politik jashtëzakonisht i vështirë, njësoj sikur të ndryshohej Kushtetuta amerikane, gjë që është diçka që legjislatura nuk e bën shpejt.”

Megjithatë, sondazhet tregojnë se rreth 70 për qind e banorëve të BE-së besojnë se institucionet e saj mund të preken nga korrupsioni. Dhe zyrtarët e Transparency International thonë se në qoftë se krerët e BE-së janë të shqetësuar për këtë, atëherë duhen marrë masa për të neutralizuar rreziqet para se ato të shndërrohen në skandale korrupsioni.