Bruksel, 1 shkurt - Nënkryetari i Delegacionit të Parlamentit Evropian, Jelko Kacin, ka kërkuar që të shqyrtohen me kujdes strukturat në veri të Kosovës, të cilat financohen nga ana e Beogradit.

Kacin, gjatë këmbimit të mendimeve me përfaqësuesin e porsaemëruar të BE-së në Kosovë, Samuel Zbogar, në Këshillin për politikë të Jashtme, ka theksuar ndërlikueshmërinë e problemit të strukturave paralele në veri të Kosovës, duke thënë se “strukturat të tjera në veri të Kosovës nuk ka”, njoftohet nga kabineti i Kacinit.

Në një takim të veçantë me Zbogarin ka thënë se nga ai pritet ndihmë që të dyja palët “me kohë të arrijnë marrëveshje për emrin e përkohshëm me të cilin Kosova përfundimisht do të mund të marrë pjesë në takimet ndërkombëtare”.

“Marrëveshje e tillë do të eliminonte mëdyshjet dhe rezervat e disa anëtarëve të BE-së dhe do të mundësonte një vendim pozitiv për ndarjen e statusit të kandidatit Serbisë në sesionin e Këshillit të BE-së më 1 mars”, ka thënë Kacin, transmeton Qik.

Nga ana e tij, Zbogar ka theksuar qëndrimin pozitiv ndaj integrimit evropian të Kosovës në dritën e hapjes së dialogut për heqjen e vizave për qytetarët e Kosovës.

Kacin dhe Zbogar janë pajtuar se është i domosdoshëm “rehabilitimi i thellë ekologjik dhe social i veriut të Kosovës”.