Berlin, 24 tetor - Presidentja e Kosovës, Atifete Jahjaga sot do të zhvillojë në Berlin në pallatin presidencial “Schloss Bellevue” një takim me homologun e saj, Joachim Gauck. Jahjaga do të ketë edhe takime të tjera të rëndësishme në institucionet e shtetit gjerman.
 
Ndërkohë, dje Jahjaga ka mbajtur një ligjëratë në Shoqatën Gjermane për Politikë të Jashtme, që është një rrjet kombëtar për politikë të jashtme në Gjermani, dhe e cila tash e 50 vjet kontribuon në formimin e mendimit politik në Gjermani.

Vizita e Jahjagës në Berlin, konsiderohet e rëndësisë së veçantë pasi Gjermania ka qenë, vazhdon dhe do të mbetet partner kryesor strategjik i Kosovës në të gjitha fushat.

Ndryshe, mediat thonë se përkundër asaj që ishte paraparë edhe mundësia e takimit me kancelaren gjermane Angela Merkel, kjo nuk do të ndodh për shkak të angazhimeve që kancelarja Merkel ka rreth formimit të koalicionit qeverisës, që po zhvillon me partinë Social Demokrate të Gjermanisë.