Haxhinasto: Kosova të përfshihet në nismat rajonale
Në fokus të takimit ishin marrëdhëniet e shkëlqyera politike e të gjithanshme me Italinë, ecuria e Nismës Adriatiko-Joniane si dhe zhvillimet në rajon, etj.
Në qendër të këtij diskutimi ishte projekti për hartimin e Strategjisë Evropiane të Makro-Rajonit Adriatiko-Jonian.
Me këtë rast, Senatori Mantica ftoi palën shqiptare për të marrë pjesë në takimin që do të organizohet në datën 25 janar 2011, në Sarajevë të Bosnjë-Hercegovinës, ku do të diskutohet gjerësisht mbi këtë projekt të rëndësishëm të bashkëpunimit rajonal.
Ministri Haxhinasto nga ana e tij shprehu mbështetjen dhe angazhimin e plotë të Qeverisë shqiptare për fuqizimin e veprimtarisë së përbashkët në kuadër të Nismave rajonale.
Në këtë kontekst, ai vlerësoi veçanërisht bashkëpunimin e ngushtë me Italinë, i cili do të ndihmojë në procesin e përmbushjes së standardeve drejt integrimit evropian të Shqipërisë.
Ministri Haxhinasto theksoi se Kosova duhet të angazhohet në nismat rajonale, pasi kështu rajoni do kualifikohet më shpejt për integrimin e tij evropian.
