Athinë, 15 janar - Fondi Monetar Ndërkombëtar ka reaguar me shpejtësi pas ndërprerjes së bisedimeve midis qeverisë dhe përfaqësuesit të bankave private, kryetari i Institutit për Financat Ndërkombëtare, Charles Dalaras.

FMN bën thirrje për rinisjen e negociatave mes Greqisë dhe kreditorëve, për të angazhuar sektorin privat në procesin e shkëmbimit të bonove greke (PSI).

Në një deklaratë, përfaqësuesja e FMN në Washington tha se "ne shohim përpara për një rinisje të bisedimeve midis Greqisë dhe kreditorëve të saj. Është e rëndësishme që këto të çojnë në një marrëveshje për PSI, të cilat së bashku me përpjekjet e sektorit zyrtar, do të sigurojnë qëndrueshmërinë e borxhit".

Analistët amerikanë janë të shqetësuar në lidhje me ngecjen e bisedimeve në Athinë, dhe vënë theksin te deklarata e kryetarit të Institutit Ndërkombëtar për Financat, sipas të cilit "bisedimet nuk arritën një përfundim të frytshëm nga të gjithë palët e përfshira. Në këto rrethana, diskutimet me Greqinë dhe autoritetet zyrtare kanë ndaluar për të reflektuar mbi të mirat e një qasje vullnetare."

 Thuhet, se pika kryesore e mosmarrëveshjes mes palëve, është norma e interesit për bonot e reja. Partnerët e eurozonës dhe FMN, duan një normë të ulët interesi prej 4%, ndërsa kreditorët privatë përfaqësuar nga kreu i Institutit Financiar Ndërkombëtar, nuk pranojnë normë nën 5%.