Bruksel, 12 mars - Reshjet e dendura të dëborës, që kanë përfshirë pjesën veriperëndimore të Evropës, kanë shkaktuar probleme të rënda në qarkullim, transport dhe në rrjetin elektrik.

Franca, Britania e Madhe, Belgjika, Holanda dhe Gjermania janë më të prekurat nga këto reshje dëbore të pazakonta që prej 10 ditësh.

Në Francë transporti lokal ka hasur vështirësi të mëdha.

Rreth shtatë milionë banorë të Parisit përdorin transportin e përbashkët publik çdo ditë.

Qarkullimi i trenave në periferi, i përdorur nga mijëra udhëtarë, është bllokuar në të gjithë rajonin.

Reshjet e dëborës pritet të vazhdojnë gjatë gjithë ditës në të gjithë rajonin parizian.

Autoritetet i kanë kërkuar kompanive ajrore që të anulojnë një pjesë të fluturimeve në aeroportet pariziane \'\'Roissy\'\' dhe \'\'Orly\'\'.

Operatori hekurudhor francez, SNCF ka publikuar mëngjesin e sotëm një komunikatë ku u bënte thirrje të gjithë banorëve të periferive të Parisit të mos udhëtonin drejt kryeqytetit, për shkak të \'\'problemeve të theksuara\'\' në rrjetin ndërurban.

Të gjitha fluturimet janë anuluar sot në aeroportin \'\'Beauvais\'\' rreth 60 kilometra nga Parisi si dhe në Lille, në veri të vendit.

Në veri, qarkullimi i trenave të shpejtësisë së lartë është bllokuar.

Kryeministri francez Jean-Marc Ayrault njoftoi se ka aktivizuar Qendrën Ndërministrore të Krizës.

Në Gjermani, reshjet e dendura të dëborës çuan në anulimin e rreth 161 fluturimeve në aeroportin e Frankfurtit.

\"Në Berlin transportet publike u bllokuan gjithashtu, qarkullimi i disa trenave u anulua. Një person humbi jetën dhe disa të tjerë u plagosën rëndë nga aksidentet e shaktuara nga ngricat\", theksuan burime nga policia.

Autoritetet gjermane presin reshje dëbore edhe më të dendura.

Reshjet e dëborës bllokuan qarkullimin.

Qarkullimi i trenave dhe autobusëve u bllokua gjithashtu. Trenat \"Thalys\", që lidhin Parisin me Brukselin mund të përjetojnë vonesa të konsiderueshme.

Ndër rajonet më të prekura, figuron pjesa jugore e Wallonia, ku dëbora pritet të vazhdojë gjatë ditës.

Në Holandë, dëbora ka shkaktuar bllokime të konsiderueshme në pjesën jugore të vendit.