Washington, 7 janar - Kongresisti amerikan Eliot Engell është deklaruar kundër tërheqjes së trupave amerikane nga Kosova.  

“Besoj se tërheqja e trupave amerikane nga Kosova nuk do të ndodhë. Mendoj se është ide e tmerrshme. Unë kam biseduar për këtë çështje edhe me sekretarin Filip Gordon. Ai më ka thënë se kjo nuk është e vërtetë. Por gjithnjë ka thashetheme. Gjërat do të lëvizin por mua më është thënë se gjatë 2012 –ës nuk do të ketë tërheqje të trupave nga Kosova.\"

\"Nëse ndërkohë shohim trysni në këtë drejtim unë do të angazhohem për vazhdimin e qëndrimit të trupave amerikane në Kosovë, pasi që mendoj se ato janë forcë stabilizuese dhe ndihmojnë në aspekte të ndryshme. Unë jam kundër tërheqjes së trupave amerikane nga Kosova”, ka deklaruar Engell në një intervistë për RTV21.

Sipas tij, Kosova është një shtet dhe nuk mund të tolerohen elementet kriminale të cilat po përpiqen ta ndajnë Kosovën.

\"Këtë dëshirojnë ta shohin disa elemente kriminale në Beograd, ata duan ndarjen faktike të Kosovës por kjo nuk mund të lejohet. Mendoj se duhet të ketë qëndrim shumë të fuqishëm kundër strukturave paralele, duhet ti shpërbëjmë ato dhe sa më herët që të ndodhë aq më mirë.\"

\"Nuk mund të tolerohet situata kur një pjesë mendon të jetë pjesë e Serbisë dhe jo e Kosovës. As ndryshimi i kufijve në Ballkan për mua nuk është i pranueshëm ngase nëse fillon një gjë e tillë nuk ka fund\", ka theksuar Engell.