New York, 23 shtator - Ministri i Punëve të Jashtme i Republikës së Kosovës, Enver Hoxhaj, gjatë qëndrimit në New York,  ka zhvilluar sot një takim me ministrin e Punëve të Jashtme të Emirateve të Bashkuara Arabe (EBA), Sheikh Abdullah bin Zayed Al Nahyan.

Ministri Hoxhaj e ka njoftuar homologun e EBA-së për progresin në Kosovë, si dhe fuqizimin e vazhdueshëm të shtetësisë e subjektivitetit ndërkombëtar.

Hoxhaj falënderoi ministrin Sheikh Abdullah për përkrahjen e EBA-së në procesin e  shtetndërtimit dhe sigurisë në Kosovë, përmes pjesëmarrjes në KFOR.

Ministri i Punëve të Jashtme i Emirateve të Bashkuara Arabe (EBA), Sheikh Abdullah bin Zayed Al Nahyan vlerësoi progresin në Kosovë, duke theksuar përkrahjen e mëtutjeshme të shtetit të tij për Kosovën.

Gjatë takimit, dy ministrat kanë biseduar edhe për procesin e njohjeve të Kosovës, me ç’rast ministri Sheikh Abdullah premtoi përkrahjen e EBA-së në rritjen e numrit të shteteve që do të njohin Kosovën, me theks të veçantë nga shtetet e mbetura arabe.

Dy ministrat biseduan edhe për bashkëpunimin ekonomik ndërmjet dy vendeve, ku u bë e ditur se pritet nënshkrimi i disa marrëveshjeve bilaterale për heqjen e taksës së dyfishtë dhe mbrojtjen e investimeve dypalëshe.

Ministri Sheikh Abdullah bin Zayed Al Nahyan theksoi se bujqësia, arsimi, minierat, energjetika dhe telekomunikacioni janë fusha me interes për investime nga ana e EBA-së.

Gjatë takimit, ministri i Jashtëm i EBA-së  premtoi se gjatë pjesës së parë të vitit 2014 do të vizitojë zyrtarisht Kosovën.

Ministri Hoxhaj dhe homologu Sheikh Abdullah kanë biseduar edhe për mundësitë e aplikimit të Kosovës në “Abu Dhabi Fund” etj.