Beograd, 21 korrik - Zëvendëskryeministri i Serbisë, Bozhidar Deliç, tha se vendi i tij është i gatshëm “të bëjë kompromis për gjithçka,” duke përfshirë statusin e Kosovës.

Por në deklaratat që i dha sot radios B92, zoti Deliç tha se kompromiset nuk do të përfshinin njohjen e pavarësisë së Kosovës.

Ai tha se Serbia nuk do ta njohë kurrë si të pavarur “krahinën jugore të Serbisë,” siç e cilësoi ai, por shtoi se qëllimi i Beogradit është gjetja e një marrëveshjeje që respekton të drejtat e shqiptarëve të Kosovës, të serbëve në Kosovë dhe interesat e shtetit serb.

Zoti Deliç tha se qeveria e tij do të paraqesë një rezolutë të balancuar në Asamblenë e Përgjithshme të Kombeve të Bashkuara pas opinionit që do të shprehë të enjten Gjykata Ndërkombëtare e Drejtësisë mbi pavarësinë e Kosovës.