Beograd, 4 shkurt - Ambasadori i Britanisë së Madhe në Serbi, Michael Davenport deklaroi sot se ndarja e Kosovës nuk do të ishte qasje konstruktive dhe se madje do të mund të ishte shumë e rrezikshme, dhe është mirë që presidenti Tadiq e ka thënë këtë qartë.

"Është shumë mirë që presidenti Tadiq ka theksuar qartë se ndarja nuk është qasja më e mirë. Ndarja nuk është qasje e mirë, dhe në njëfarë mënyre madje është edhe e rrezikshme, sepse do të kishte pasoja të këqija edhe në shtetet tjera të rajonit”, tha Davenport për B92, duke shtuar se edhe qëndrimi i Britanisë është i tillë.

Sa i përket planit prej katër pikave të Tadiqit, Davenport tha se ato pika janë elemente të rëndësishme për çfarëdo zgjidhje për Kosovën.

"Të katër pikat janë të instaluara në Planin e Ahtisaarit, natyrisht me zgjidhje tjera sa i përket statusit”, ndërkaq, lidhur me prezantimin e Kosovës në forumet rajonale, Davenport paraqiti qëndrimin se duhet arritur në zgjidhjen që do t’i mundësojë Prishtinës të marrë pjesë në ato tubime dhe se është në interesin e të gjitha palëve që Kosova të luajë rolin e saj të plotë në forumet rajonale.

"Kjo nuk është çështje e njohjes, por e prezantimit”, shtoi ai.

"Nuk pres tashti që Serbia ta njohë Kosovën si shtet të pavarur. Është e qartë se Serbia ka politikë tjetër dhe nuk do që ta njohë Kosovën, por është me rëndësi që të punojmë bashkë për të arritur deri te normalizimi i raporteve ndërmjet Beogradit dhe Prishtinës, tha ambasadori britanik.

Davenport theksoi se bashkëpunimi rajonal është element shumë i rëndësishëm, madje ai paraqet bazën më të rëndësishme të të gjitha parimeve të BE-së”, tha ambasadori britanik, duke u përgjigjur në pyetjen se a do të mund Beogradi të merrte kandidaturën për BE nëse nuk merret vesh me Prishtinën për prezantimin rajonal.