Beograd, 7 maj - Ndërsa ka pohuar se pas përvojës me zhbërjen e Jugosllavisë, Evropa është e vetmja perspektivë për Ballkanin, kryeministri i Serbisë Ivica Daçiq i ka thënë ‘Kuririt’ të Vjenës se “Kosova vështirë mund të bëhet anëtare e Kombeve të Bashkuara”.

Duke folur për konfliktet në hapësirat e ish-Jugosllavisë, Daçiq është shprehur se “krime kishte nga të gjitha palët” dhe se tani “është koha për shërimin e plagëve nga e kaluara”, kurse shikimi pas askënd s’e ndihmon por vetëm thellon konfliktet.

“Jam shumë pragmatik. Sikur me kryeministrin e Kosovës Hashim Thaçin të flisja për të kaluarën, e gjitha do të përfundonte me grindje të rëndë. S’do të kishte marrëveshje. Mund të ndryshojë vetëm e tashmja dhe e ardhmja dhe jo e kaluara”, ka deklaruar Daçiq.

Por kryeministri ka përsëritur se Serbia me Marrëveshjen nuk e ka njohur Kosovën, sikundër as pesë vende të BE-së dhe se Kosova do ta ketë shumë të vështirë të bëhet anëtare e Kombeve të Bashkuara.