Bosnjë, ministrat serbë kundërshtojnë vizat për kosovarët
Ministrat e Bosnjës të dy partive kryesore të serbëve, Aleanca e Socilademokratëve të Pavarur, SNSD dhe Partia Demokratike Serbe, SDS, kanë kundërshtuar fuqishëm dhënien e vizave qytetarëve të Kosovës për ta vizituar Bosnjën, u ka thënë gazetarëve ministri i Sigurisë, Sadik Ahmetoviq, pas një mbledhje të qeverisë, ku është shqyrtuar kjo çështje.
Diskutimi ka nxjerr në pah kundërshtimin e qëndrimeve të ministrave në Qeverinë e re në lidhje me çështjen e Kosovës, ka thënë Ahemtoviq për Ballkan Insight, duke shtuar se Serbia duket më progresive sesa Bosnja, kur është në pyetje çështja e Kosovës.
“Edhe pse Serbia ka hapur bisedimet për disa çështje elementare, siç janë qarkullimi i lirë i njerëzve, kalimi i vendkalimeve dhe disa çështje të tjera me rëndësi për jetën e përditshme, nganjëherë krijojmë probleme më të mëdha sesa ato që janë në Beograd”, ka thënë ai.
I vetmi informacion që është dhënë për diskutimin në lidhje me Kosovën, të martën, është se Ministria e Jashtme është obliguar që të mendojë për zgjidhjet e mundshme për dilemat, për mbledhjen e ardhshme të qeverisë, por Ahmetoviq ka thënë se me gjasë nuk do të ketë zgjidhje të shpejtë.
“Problemi është se disa njerëz karrierën e tyre politike e ndërtojnë në çështjet siç është Kosova”, ka thënë ai. “E vetmja gjë që mund ta bëjmë është që t’ua mundësojmë qytetarëve të Kosovës, të cilët dëshirojnë, të vijnë në Bosnjë sipas Ligjit ton për qarkullimin dhe qëndrimin e të huajve dhe azilit”, ka thënë Ahmetoviq.
Bosnjë e Hercegovina është e vetmja ish-republikë e Jugosllavia, bashkë me Serbinë, që nuk e ka njohur Kosovën si shtet i pavarur.(Elvira Jukiq, BIRN Sarajevë)
