Biden përshëndet marrëveshjet mes Kosovës dhe Serbisë
Biseda zyrtare ishte shumë miqësore dhe u diskutuan temat që kanë të bëjnë me zhvillimin e Kosovës dhe proceset e demokratike.
Në vazhdimësi të bisedës së shkurtër në Romë, më 2 Qershor, Zëvendës Presidenti Joseph Biden dhe Presidentja e Kosovës, Atifete Jahjaga, kanë zhvilluar sot një bisedë telefonike.
Zëvendës Presidenti e ka përgëzuar sërish zgjedhjen e Presidentes Jahjaga dhe ka theksuar mbështetjen e vazhdueshme dhe të pakthyeshme të SHBA-së për pavarësinë, integritetin territorial, sovranitetin dhe demokracinë shumëetnike të Kosovës.
Biden i ka mirëpritur marrëveshjet e arritura në takimet e 2 Korrikut në dialogun e lehtësuar nga Bashkimi Evropian, ndërmjet Kosovës dhe Serbisë dhe ka inkurajuar përparimin e mëtejmë ndërmjet palëve rreth çështjeve që mund të sjellin përfitime praktike për qytetarët e të dyja vendeve.
Zëvendës Presidenti Biden dhe Presidentja Jahjaga kanë biseduar, gjithashtu, për angazhimin e Qeverisë së Kosovës në luftimin e korrupsionit, forcimin e sundimit të ligjit dhe vazhdimin e reformave të brendshme në Kosovë, duke vënë në dukje se ato janë fundamnetale për inkurajimin e investimeve dhe promovimin e rritjes ekonomike.
