Munih, 3 shkurt - Presidentja e Republikës së Kosovës, zonja Atifete Jahjaga u takua sot në Munih me zëvendëspresidentin e SHBA-së, Joseph Biden. 

Presidentja Jahjaga, duke e shprehur kënaqësinë për këtë takim, tha se e falënderon zëvendëspresidentin dhe SHBA-të për angazhimin dhe për ndihmën që i kanë dhënë dhe po i japin konsolidimit të shtetit dhe të shoqërisë kosovare.

"Ne jemi përjetësisht të falënderueshëm që duke na ndihmuar na keni dhënë shansin të jetojmë në liri, ndërsa tash e çmojmë lart mbështetjen që po na jepni në rrugën tonë drejt anëtarësimit në Bashkimin Evropian", ka theksuar ajo.

Republika e Kosovës sipas saj ka bërë progres të konsiderueshëm në këtë rrugë dhe tash jemi duke treguar vullnetin e mirë për normalizimin e marrëdhënieve me Republikën e Serbisë.

"Ne jemi të përkushtuar në këtë proces duke qenë thellësisht të bindur se animozitetet e së kaluarës të mos ia lëmë barrë gjeneratave të ardhshme", ka pohuar Jahjaga.

Presidentja Jahjaga theksoi se ka shprehur gatishmërinë që si Presidente e Republikës së Kosovës të takohet me Presidentin e Republikës së Serbisë, për t’i dhënë përkrahje dialogut ndërmjet dy qeverive, në mënyrë që të normalizohen plotësisht marrëdhëniet ndërmjet dy shteteve të pavaruar dhe sovrane.

Zëvendëspresidenti i SHBA-ve Joseph Biden i shprehu Presidentes Jahjaga përkrahjen e plotë në agjendën evropiane të Republikës së Kosovës, si dhe në dialogun që Kosova po e bën me Serbinë për normalizimin e marrëdhënieve ndërmjet këtyre dy vendeve duke e cilësuar si kontribut takimin ndërmjet Presidentes Jahjaga dhe Presidentit Nikolic.

Zëvendëspresidenti Biden theksoi se SHBA-të do t’i japin përkrahje të fuqishme Republikës së Kosovës në të gjitha proceset demokratike.

Biden e ka përkrahur Kosovën në forcimin e shtetit dhe ka thënë se pavarësia është proces i kryer dhe se Kosova sovranitetin dhe integritetin territorial i ka të garantuar.