Tiranë, 24 tetor - Kryeministri Berisha ka deklaruar të hënën se Kosova, në disa prej aspekteve të bashkëpunimit, është de fakto anëtare e NATO-s.

Duke folur në takimin e “Kartës së Adriatikut”, kreu i qeverisë shqiptare theksoi se mbështetja e NATO-s ka qenë mjaft e rëndësishme për Kosovën.
 
“Në disa aspekte Kosova është de fakto anëtare e NATO-s, por jo de juro. Me bashkëpunimin që ka me KFOR, Kosova është një vend me garanci, stabilitet dhe paqe në rajon. Jam i bindur që pas kapërcimit të problematikës në Veriun e Kosovës, Serbia do të marrë rolin që i takon”, tha Berisha.

Kryeministri Berisha gjithashtu theksoi se qëndrimi i qeverisë shqiptare për të ardhmen e Aleancës dhe hyrjen e vendeve të reja është i qartë.

“Shqipëria është e hapur për bashkëpunimin e ngushtë me vendete tjera dhe do të mbështes aspiratën e vendeve të tjera”, tha Berisha.

Ai shtoi gjithashtu se nisma e ndërmarrë vite më parë mes vendeve të rajonit ka rezultuar e suksesshme dhe se tashmë rajoni është më i sigurt dhe më i qartë në objektivat e tij.