Bruksel, 27 dhjetor - Vizita e Kryeministrit japonez, Shinzo Abe në sanktuarin Yasukuni, i konsideruar nga Kina dhe Koreja e Jugut si një simbol i makabriteteve të kryera në të kaluarën nga ushtria japoneze, “nuk kontribuon në uljen e tensioneve në rajon”, deklaroi shefja e diplomacisë së Bashkimit Evropian, Catherine Ashton përmes një komunikate.

”Përfaqësuesja e Lartë e BE-së për Politikën e Jashtme dhe Sigurinë ka ndjekur me kujdes vizitën e Kryeministrit japonez, Shinzo Abe në sanktuarin Yasukuni”, sqaronte në komunikatë zyra e shtypit e BE-së.

”Ky veprim nuk është i përshtatshëm për uljen e tensioneve në rajon dhe as në përmirësimin e marrëdhënieve të Japonisë me fqinjët, në veçantë me Kinën dhe Republikën e Koresë”, thuhet në komunikatë.