Bruksel, 11 maj - Ministri i Jashtëm spanjoll, Miguel Angel Moratinos deklaron se është arritur një marrëveshje lidhur me Konferencën e Sarajevës, e cila do të mbahet si takim jozyrtar i të gjitha palëve, ngjashëm sic mbahen takimet ministrore të BE-së.

"Mund t'iu konfirmoj se Konferenca e Sarajevës është përgatitur mirë, dhe se është arritur marrëveshje për ‘formulën Gymnich’ që do të zbatohet”, ka theksuar Moratinos, i cili kryeson Këshillin e Ministrave të BE-së.

Kryediplomati spanjoll ka deklaruar për agjencinë “Beta” se në bazë të kësaj formule është arritur marrëveshja me të gjitha palët, përfshirë Kosovën dhe Serbinë.

Moratinos shprehu dëshirën e BE-së që në Konferencën e Sarajevës të marrin pjesë jo vetëm 27 vendet anëtare të unionit, por edhe SHBA, Rusia dhe Turqia, në mënyrë që të sigurohet stabilitet i përbashkët dhe të forcohet e ardhmja e të gjitha vendeve të Ballkanit.