05 Korrik 2024

Politologu Fisnik Halimi i bashkohet PDK-së

Prishtinë, 23 mars - Politologu Fisnik Halimi, i cili më herët ka qenë pjesë e subjektit politik “Ora”, i është bashkuar sot Partisë Demokratike të Kosovës (PDK). Kryetari i PDK-së, Hashim Thaçi, ka thënë se ka ardhur koha për t’i bashkuar forcat qytetare për zhvillimet që na presin.

Kryetari i PDK-së, Hashim Thaçi, pasi i ka uruar mirëseardhje në parti, ka thënë se Fisnik Halimi është një ndërmarrës i suksesshëm. “Dëshiroj që sot t’i uroj mirëseardhje një anëtari të ri të ekipit tonë. Mirëpres të punojmë në vitet në vijim me Fisnik Halimin, një aktivist i mëhershëm shoqërisë civile dhe skenës politike. Sot Fisniku është edhe ndërmarrës i suksesshëm, por edhe është në përfundim të doktoratës në universitetin prestigjioz të Sorbonës në Francë.

Fisniku më herët ka qenë edhe gazetar për medie të huaja si dhe ato vendore. Ka shërbyer edhe si Sekretar i partisë politike “Ora”. Më duhet të them se kam një respekt të veçantë edhe për prindërit e tij Halit Halimi, një nga profesorët e famshëm të katedrës së frëngjishtes në Universitetin e Prishtinës si dhe të ndjerën shkrimtaren Hida Halimi, ndër gratë e para romanciere të Kosovës”, është shprehur Thaçi.

Thaçi ka thënë se tani ka ardhur koha për t’i bashkuar forcat. “Siç e dini, në të kaluarën unë dhe Fisniku i kemi takuar poleve të ndryshme të politikës, por tani qëndrojmë së bashku ngase të gjithë po e kuptojmë se koha ka ardhur t’i bashkojmë forcat qytetare për zhvillimet që na presin. Unë kam pasur fatin që të jem në krye të këtij misioni të ri. Por, sinqerisht besoj se çdo kosovar duhet të na bashkohet në këtë drejtim. Prandaj, jam i hapur për çdokënd që beson në misionin e ri. Pas lirisë dhe shtetformimit, i kemi bazat për ngritjen e hovshme të kualitetit të jetës të të gjithë qytetarëve tanë dhe në këto zhvillime kemi nevojë të jemi së bashku”, ka deklaruar Thaçi, duke shtuar se në muajt e ardhshëm do ta përcjell këtë porosi të unifikimit në çdo qytet të Kosovës. “Do të ftoj secilin të na bashkëngjitet. Ju ftoj ta nisim këtë etapë të re të historisë sonë të përbashkët”, ka deklaruar Thaçi.

Ndërkaq, Fisnik Halimi, ka thënë se është kënaqësi të jetë pranë liderit të PDK-së, për t’i bashkuar forcat për të ecur drejt një Kosove edhe më të mirë.

“Uroj që së bashku me forca të reja të ecim drejt fitoreve të reja, drejt arritjes së caqeve edhe më të rëndësishme që e presin përpara vendin tonë. Besoj se me shumë kolegë dhe miq nga jeta publike, nga shoqëria civile, nga ish-organizata ime politike do të ia arrijmë t’ju ndihmojmë t’i arrijmë caqet e përbashkëta, në mënyrën më të mirë”, ka thënë Halimi.
 

Kalendari

Ngjarjet e datës 8 gusht 2023

 - Partia Demokratike e Kosovës, mban konferencë për media. (Selia Qendrore e PDK-së, ora 11:00)

 

 - Ministria e Kulturës, Rinisë dhe Sportit, organizon shfaqjen e filmave “I Pabesi” dhe “Heshtja Vret”. (Kino “Armata”, ora 20:00)