Prishtinë, 12 dhjetor - Në 70 vjetorin e themelimit të tij, UNICEF-i feston progresin e madh të cilin e ka bërë për fëmijët e botës - dhe bën edhe një herë thirrje urgjente për arritjen e miliona fëmijëve jetët dhe e ardhmja e të cilëve rrezikohen nga konfliktet, krizat, varfëria, pabarazia dhe diskriminimi.

“UNICEF-i u themelua pas Luftës së Dytë Botërore për të sjellë ndihmë dhe shpresë për të gjithë fëmijët që janë në rrezik apo në nevojë – pavarësisht se në cilin shtet jetojnë apo çfarë roli ka luajtur ai shtet në luftë. Misioni ynë është po aq urgjent dhe universal edhe sot,” tha Drejtori Ekzekutiv i UNICEF-it, Anthony Lake.

“Me kaq shumë fëmijë në mbarë botën që janë në nevojë, ne po ripërkushtohemi që të arrijmë rezultate për secilin fëmijë.” 

Organizata u themelua nga Asambleja e Përgjithshme e Kombeve të Bashkuara për t’u ndihmuar fëmijëve të Evropës, Kinës dhe Lindjes së Mesme të pasluftës.

I financuar plotësisht nga kontributet vullnetare të qeverive, shoqërisë civile, sektorit privat dhe qytetarëve të shqetësuar, shumë shpejt e zgjeroi ndikimin e vet dhe deri në vitin 1955 po punonte për fëmijët në më shumë se 90 shtete.

Sot, UNICEF-i është organizata më e madhe e fëmijëve në botë, e cila punon me partnerë në 190 shtete dhe territore dhe me përkushtimin e 13,000 pjesëtarëve kombëtar dhe ndërkombëtar të stafit për ta arritur secilin fëmijë.

“Vizioni i UNICEF-it për 70 vitet e ardhshme është një botë në të cilën puna jonë nuk do të jetë më e nevojshme – një botë në të cilën çdo fëmijë është i shëndetshëm, i sigurtë, i arsimuar, i mbrojtur dhe me njerëz që kujdesen për ta... dhe ku të gjithë fëmijët mund të arrijnë potencialin e tyre të plotë,” thotë Lake.

“Kjo është gjëja e duhur për t’u bërë dhe rruga më e sigurtë për një të ardhme më të mirë për të gjithë ne.”