Wuerzburg, 19 korrik - Një person plagosi me sëpatë mbrëmjen e të hënës 4 pasagjerë të një treni rajonal pranë Wuerzburgut, në landin jugor gjerman të Bavarisë.

Zëdhënësi i policisë tha se 3 nga të plagosurit janë në gjendje të rëndë, ndërsa i katërti ka marrë plagë të lehta.

Ndërkohë zëdhënësi i Ministrisë së Brendshme të Bavarisë njoftoi se sulmuesi u qëllua për vdekje nga policia, duke shtuar se dyshohet që ai ka vepruar i vetëm.

Ministri bavarez i punëve të brendëshme Joachim Herrmann theksoi se dyshohet që sulmuesi të ketë thënë fjalë për Islamin, por nuk ka dhënë detaje, për të cilat tha se pritet të verifikohen. Momentalisht policia gjermane refuzon të komentojë motivet e sulmit.