Bruksel, 9 shkurt - Sot në Bruksel pritet të vazhdojë dialogu në mes të Republikës së Kosovës të cilën do ta përfaqësoj kryeministri Isa Mustafa dhe Republikës së Serbisë që do ta përfaqësoj kryeministri Aleksandar Vuçiq.

Sipas mediave serbe, temë do të jetë formimi i Asociacionit të Komunave serbe dhe harmonizimi i gjyqësorit “që siguron të drejtat dhe interesat e serbëve në sistemin e Kosovës”.

Këto informata thuhet se ia dhanë agjencisë Beta burimet diplomatike evropiane, të cilat nuk janë të sigurta nëse do të hapen temat tjera që nuk janë në rendin e ditës.

“Këto kanë të bëjnë kryesisht me çështjet e pasurisë së Serbisë në Kosovë, që u nis me tentimet e autoriteteve të Prishtinës për të nacionalizuar Trepçën, si dhe shkarkimin e ministri serb në Qeverinë e Kosovës që u dënua nga Beogradin duke thënë se mund të ketë efekte në dialogun me Prishtinën në Bruksel”, raporton Beta.

Përfaqësuesja e lartë e Bashkimit Evropian për Politikë të Jashtme dhe Siguri, Fredeica Mogherini ka ftuar formalisht kryeministrin e Kosovës Isa Mustafa dhe atë të Serbisë Aleksandar Vuçiq që të takohen në Bruksel dhe vazhdojnë procesin e dialogut.

Ndërsa qeveria e Kosovës ka njoftuar se gjatë vizitës në Bruksel, kryeministri Isa Mustafa, do të takohet me përfaqësuesen e Lartë të BE-së për Punë të Jashtme dhe Politika të Sigurisë / zëvendës presidente e Komisionit Evropian, Federica Mogherini, në kuadër të dialogut të lehtësuar nga BE-ja për normalizimin e raporteve ndërmjet Republikës së Kosovës dhe Republikës së Serbisë.

Për rezultatet e takimit, kryeministri Mustafa, pas kthimit në Kosovë, do të informojë Kuvendin e Republikës së Kosovës.

Kryeministri Mustafa, gjatë qëndrimit në Bruksel  po ashtu do të zhvillojë takime të nivelit të lartë me përfaqësues të tjerë të Bashkimit Evropian si dhe të NATO-s.