Washington, 13 korrik - Guvernatori i Uiskonsinit, Scott Walker, nëpërmjet një postimi në rrjetin social “Twitter” ka treguar vendimin e tij për të garuar për drejtimin e Shtëpisë së Bardhë.

Lajmin e bëri të ditur mëngjesin e së hënës duke thënë: “Po, unë do të garoj, sepse amerikanët kanë nevojë për një lider që të luftojë për ta dhe të fitojë për ta”.

Ndërsa në një video të postuar në Youtube, Walker shpreht se “Amerika ka nevojë për një lidership të ri e të freskët, me ide të mëdha nga jashtë Uashingtonit, për t’i realizuar objektivat”.

“Shpresoj që të nxjerr në pah aftësitë e mija si një guvernator konservator i një shteti, ku kam fituar tre zgjedhje në një hark kohor prej 4 vjetësh, përfshirë këtu një fitore në një kontest me sindikatat e punës pas rizgjedhjes në vitin 2012”, ka thënë kandidati për president në SHBA.

Ai gjithashtu, konsiderohet si një kandidat i rëndësishëm në garën e republikanëve për nominimin e kandidatit për president. Ndërkohë, Walker ka përballë 14 rivalë që e kanë nisur garën shumë më herët.