Phenian, 11 mars - Lideri suprem i Koresë së Veriut Kim Jong Un i ka urdhëruar trupat strategjike të Ushtrisë Popullore të jenë të gatshme për sulme bërthamore, njofton agjencia shtetëtore e lajmeve KCNA.

Ai e bëri deklaratën gjatë inspektimit të stërvitjes së lëshimit të raketave balistike nga trupat strategjike.

Kim Jong Un tha se Koreja e Veriut do të vazhdojë provat bërthamore, me synim rritjen e aftësisë për sulme bërthamore.

Ai kërkoi që ekipet studimore të armëve bërthamore të hartojnë rregulloren e administrimit të predhave bërthamore, për të garantuar shpejtësinë e sigurinë e sulmit bërthamor, në rast emergjence.

Lideri suprem koreanoverior kërkoi krijimin e një sistemi të vetëm drejtues dhe të administrimit të armëve bërthamore.