Beograd, 22 dhjetor - Shefi i delegacionit të Bashkimit Evropian në Serbi, Vincent Degert, ka thënë se në platformën e Serbisë për Kosovën ka elemente të mira, por se ka pjesë që duhet të përpunohen që të jenë të pranueshme për të dyja palët.
 
”Presidenti i Serbisë, Tomisllav Nikoliq, siç unë e kam kuptuar, ua ka ndarë ambasadorëve versionin punues të platformës për Kosovën. Presim ta shohim dokumentin final e atëherë do t’i japim komentet tona.\"

\"Nga ajo që kemi parë ka elemente të mira, të cilat ofrojnë shansin që të ecim para me dialogun. Megjithatë, janë aty disa pjesë që kërkojnë ende përpunime të rafinuara, që të jenë të pranueshme për të gjitha palët në proces”, ka vlerësuar ai.

Ai ka komentuar edhe qëndrimin e BE-së kundë ndryshimiit të kufijve në Ballkan dhe kundër ndarjes së Kosovës.

”Për BE-në është i rëndësishëm stabiliteti në rajonin e Ballkanit Perëndimor dhe gjithçka që shkakton tensione dhe pasiguri duhet të shmanget. Tërheqja e kufijve në baza etnike nuk është në përputhje me vlerat evropiane dhe është në kundërshtim me aspiratat për të krijuar lirinë e lëvizjes dhe për të siguruar respektimin e të drejtave të pakicave”, theksoi Degert.