Ban Ki-moon, i shqetësuar me vonesën e Speciales
Ky raport përfshin periudhën e zhvillimeve nga 16 prilli deri më 15 korrik dhe u është dërguar anëtarëve të Këshillit të Sigurimit, para se të votohej miratimi i amendamentit për krijimin e Gjykatës Speciale nga Kuvendi i Kosovës.
Ban më tej në raport thotë se ka mirëpritur ‘vazhdimin e bisedimeve teknike dhe të nivelit të lartë midis Beogradit dhe Prishtinës në veçanti adresimin e çështjeve si themelimin e Asociacionin e komunave serbe dhe çështjet që lidhen me energjinë dhe telekomunikacionin.
Ai gjithashtu thotë se e ka mirëpritur edhe ‘bashkëpunimin produktiv midis liderëve lokalë, kryetarëve të Veriut dhe Jugut të Mitrovicës.’
“Ky trend pozitiv dhe i rëndësishëm duhet të ruhet dhe të forcohet. Iniciativa të tilla që konkretisht përmirësojnë jetën e përditshme të qytetarëve të Kosovës, ndihmojnë në uljen e tensioneve dhe nga to përfitojnë të gjitha komunitetet”, thekson Ki-moon.
Ai po ashtu ka mirëpritur miratimin nga Komisioni Evropian të propozimit për një Marrëveshje të Stabilizim Asocimit me Kosovën, si dhe progresin e vazhdueshëm drejt liberalizimit të vizave, që i ka quajtur “shenja të rëndësishme për reformat institucionale që Prishtina vazhdon të zbatojë në rrugën e saj evropiane”.
Shefi i Kombeve të Bashkuara ka theksuar në raport edhe çështjen e të zhdukurve dhe u ka bërë thirrje autoriteteve të Kosovës që të emërojnë një udhëheqës të ri të Grupit Punues për Personat e Zhdukur.
Ai në fund të raportit gjithashtu konstaton se ‘Kosova dhe rajoni vazhdojnë të përballen me sfida transnacionale, sidomos nga radikalizmi i të rinjve dhe ekstremizmi i dhunshëm,’ një çështje kjo e ngritur sërish dhe që nuk ka kaluar heshtur as në mbledhjet e shkuara të Këshillit të Sigurimit.
Kryesues i radhës për këtë muaj i Këshillit është Nigeria, ndërsa seanca për Kosovën mbahet më 21 gusht.
/Rtk/
