Tiranë, 7 mars - Shqipëria nënshkroi të mërkurën në Berlin një marrëveshje bashkëpunimi dyvjeçare me Organizatën Botërore të Turizmit të Kombeve të Bashkuara (UNWTO) për të përmirësuar aftësinë konkurruese të sektorit shqiptar të turizmit.

Sipas marrëveshjes, UNWTO-ja do të japë ndihmë në tri fusha kryesore: marketing dhe promovim, përmirësimin e kapaciteteve dhe menaxhimin e destinacioneve turistike, si edhe lehtësimin e procedurave për turistët.

Shqipëria, e cila merr pjesë në Panairin Ndërkombëtar të Turizmit në Berlin, është anëtare e UNWTO-së, që përbëhet nga 162 vende dhe më shumë se 400 anëtarë që përfaqësojnë sektorin privat, institucionet arsimore, shoqatat e turizmit dhe autoritetet vendore të turizmit.