Prishtinë, 14 qershor - Kryeministri Hashim Thaçi, ka bërë të ditur sot për mbështetjen që Qeveria e Kosovës ka dhënë për botimin e një guide që promovon turizmin malor dhe rural.

Në një postim në rrjetin social facebook, Thaçi u ka rekomanduar qytetarëve që të bëhen pjesë e turizmit malor dhe rural, e që mos të shkojnë në pushime vetëm në bregdet.

“Këto ditë më ra në dorë kjo guidë me mbi 300 foto mahnitëse nga bjeshkët e Sharrit, Rugovës, Deçanit, Junikut, Istogut dhe të tjera malësi të bukura të Kosovës. Botimi është mbështetur nga Qeveria e Kosovës në vazhdën e përpjekjeve për të zhvilluar turizmin malor e rural. Pjesën më të madhe të këtyre vendeve kam pasur kënaqësinë ta vizitoj vetë, por zbulova disa që ende nuk i kam parë. Bashkëqytetarët tanë preferojnë detin për pushim, mirëpo unë u rekomandoj që të eksplorojnë edhe bjeshkët atraktive dhe peizazhin rural të Kosovës. Ju garantoj që bukuria e natyrës dhe mikpritja e banorëve nuk do t\'ju zhgënjejë! HTH”, ka shkruar Thaçi në facebook.