Beograd, 24 shkurt - Viteve të fundit është vërejtur një interesim në rritje te serbët për t’i kaluar pushimet në Shqipëri. Arsye kryesore llogaritet çmimet e lira që ofron ky vend në raport me vendet tjera në rajon.

Agjencitë turistike serbe kanë bërë të ditur për mediat beogradase se as ngjarjet e muajve të fundit që ngallën tensione mes të Serbisë dhe Shqipërisë, siç janë “Droni” dhe vizita e Edi Ramës në Beograd, nuk kanë ndikuar fare në interesimin e qytetarëve serbë për të kaluar pushimet verore në Shqipëri.

Në faqen e internetit të agjencisë turistike “Falcon”, në kategorinë e aranzhimet e pushimeve “Vera 2015”, Shqipëria renditet si ofertë e parë, para Malit të Zi dhe Greqisë.

Në pakot që ofrojnë këto agjenci turistike, një ofertë e cila kushton vetëm 215 euro, për 11 ditë pushim në Shqipëri, përfshihet transporti me autobus, shtatë netë me mëngjes në hotel me tre yje në Sarandë, një shtrat me mëngjes në Durrës, si dhe programe të tjera të vizitave nëpër vende të rëndësishme.

“Ndoshta arsyeja kryesore pse Shqipëria ka ngjallur interes për qytetarët serbë, është çmimi shumë i volitshëm. Gjithashtu kushtet janë me të vërtetë fantastike sepse bregdeti dhe bukuritë e plazheve mund të krahasohen me destinacione të zhvilluara turistike”, ka thënë një zyrtar i kësaj agjencie për portalin Telegraf.rs.

Ata thonë se dalëngadalë kanë filluar të bien paragjykimet e të kaluarës për Shqipërinë, dhe tani ky destinacion është bërë shumë popullor për qytetarët në Beograd.

“Kemi vërejtur se ka shumë interesim nga ana e punëtorëve të arsimit, te të rinjtë kurioz për të eksploruar vende ku nuk kanë qenë më parë, por edhe te të moshuarit. Për momentin interesim më të madh ka për Durrësin, në ato hotele ku stafi flet edhe serbisht”, thotë një përfaqësues i njëri prej agjencioneve turistike serbe.