Athinë, 8 mars - Turistët që kanë zgjedhur të vizitojnë Greqinë këtë javë kanë mbetur mjaft të zhgënjyer, teksa të gjitha muzetë dhe vendet arkeologjike në vend janë mbyllur, pasi Ministria e Kulturës ka shpallur ditën e sotme një grevë që do të zgjasë 24 orë.

Të gjithë punonjësit e këtyre institucioneve kulturore janë në grevë kundër masave të qeverisë, e cila kërkon që të ndryshojë strukturën e Ministrisë së Kulturës.

Turistë nga e gjithë bota, kanë ardhur në Athinë dhe vende të tjera arkeologjike për të vizituar muzetë historikë dhe kulturorë të vendit.

Një turist amerikan u shpreh mjaft i zhgënjyer teksa tha: “Sot ishte edhe ditëlindja ime dhe kisha planifikuar që me këtë rast të vizitoja Akropolin.”

Një numër mjaft i madhe turistësh u mblodhën përpara hyrjes kryesore të Akropolit, për të marrë shpjegime nga personeli për situatën e krijuar.

Kjo grevë vjen në një moment të papërshtatshëm ku Greqia ka njohur një ulje të turizmit për shkak të krizës globale si dhe trazirave sociale që kanë përfshirë vendin.