Nënshkruhet kontrata për dhënien me koncesion të Brezovicës
Kontrata është nëshkruar prej ministres së Ministrisë së Tregtisë dhe Industrisë, znj. Hykmete Bajrami dhe përfaqësuesit zyrtar të Kozorciumit francez, z. Pascal Roux.
Ministrja e Ministrisë së Tregtisë dhe Industrisë, Hykmete Bajrami tha se për 3 vjet në Brezovicë do të investohen nga kozorciumi 167 milionë euro.
Nënshkrimi i kontratës u bë një javë pas takimit të KDNM-së në të cilin u konfirmua përmbushja e parakushteve për formalizimin e kontratës nga ana e konsorciumit dhe u miratuan afatet dhe kushtet e kontratës.
Në bazë të Ligjit të Prokurimit, kontrata nuk do të hyj në fuqi të plotë për një periudhë prej 6 muajsh (e emëruar si periudha e kushteve paraprake), gjatë së cilës, konsorciumi francez, në bazë të Kërkesës për Propozim, duhet të dorëzoj dokumentet shtesë si: përmbylljet financiare dhe planin e vlerësimit mjedisor.
Në bazë të propozimit, investimet parashihen të bëhen në disa faza e që kapin shumën totale prej 409 milion eurosh. Faza e parë përfshinë investimet prej 165 milion eurosh gjatë një periudhe 3 vjeçare. Koncepti zhvillimor i propozimit parasheh objekte me shfrytëzim të shumëllojshëm për të ofruar aktivitete turistike gjatë tërë vitit.
Investimet e lartpërmendura pritet të krijojnë mbi 3000 vende të reja të punës.
