Prishtinë, 6 shkurt - Agjencia e Statistikave të Kosovës (ASK) ka publikuar  “Repertorin statistikor mbi ndërmarrjet ekonomike në Kosovë “ TM4–2013 sipas se ciles në TM4 2013, gjithsej janë regjistruar 1805 ndërmarrje, ndërsa në TM3-2013 kanë qenë 2011 sosh, që vërehet një rënie në mes tremujorëve të njëjtit vit për 206 ndërmarrje ose 10.2 për qind më pak ndërmarrje të regjistruara në këtë tremujorë.

Një rënie vërehet edhe te bizneset e reja prej 20.2 për qind krahasuar me TM4 2012.

Aktivitetet ekonomike më të preferuara gjatë këtij tremujori ishin: Tregtia me 559 ndërmarrje ose 31 për qind, pasuritë e patundshme dhe dhënia me qira 197  ose 10.9 për qind, bujqësia, gjuetia dhe pylltaria 189 ose 10.5 për qind, ndërtimtaria me 174 ose 9.6 për qind, hotelet dhe restorantet me 161 ose 8.9 për qind, industria përpunuese 159 ose 8.8 për qind, aktivitetet tjera shoqërore dhe personale 147 ose 8.1 për qind , transporti, depot dhe telekomunikacioni me 143 ndërmarrje ose 7.9 për qind, ndërsa aktivitetet tjera marrin pjesë në shkallë shumë të vogël.

Kategoritë e numrit të punësuarve nga 1-4 (të punësuar) përbën rreth; 1748 ndërmarrje ose  96.8 për qind të ndërmarrjeve të reja,  5-9 me 42 ose 2.3 për qind; 10-19 me 9 ose 0.5 për qind;  20-49 dhe 50-249 të dyja me nga 3 ndërmarrje ose 0.2 për qind, ndërsa në kategoritë tjera nuk është asnjë ndërmarrje e regjistruar në këtë tremujorë.

Kurse, sa i përket shtrirjes së ndërmarrjeve të reja nëpër komuna mbizotëron:  Prishtina me 526 sosh  ose  29.1 për qind, Ferizaj me 138 ose 7.6 për qind, Prizreni me 129 ose 7.1 për qind, Peja me 87 ose  4.8 për qind, Gjilani dhe Gjakova me nga 74 ose 4.1 për qind, Mitrovica me 71 ose 3.9 për qind, ndërsa komunat tjera kanë numër më të vogël të ndërmarrjeve të reja gjatë këtij tremujori.