Prizren, 26 nëntor - Projekti tradicional “Javët e Biznesit Kosovar 2013", ka vazhduar me ekspozimin e prodhimeve vendëse  në Prizren me qëllim të ngritjes së vetëdijësimit të qytetarëve për konsumimin e prodhimeve vendëse. Prezantimin e prodhimeve të tyre e kanë bërë dhjetra biznese vendëse.

Agim Shahini, kryetar i Aleancës Kosovare të Bizneseve, tha se tash  njëmbëdhjetë vjet me këtë projekt po ndërtojnë kanale të reja komunikimi në mes prodhuesve vendës dhe konsumatorëve. Sipas tij projekti tradicional “Javët e Biznesit Kosovar", po  i  jep  prodhuesve vendës një kredibilitet  të ri në tregun vendës dhe po shërben sı shtytje për ngritje të shkallës së eksportit, vendit zhvillim ekonomik dhe krijimit të vendeve të reja të punës.

“Jo rastësisht projekti realizohet sot kur përurohet autostrada nga Vërmica deri në dalje të Prishtinës dhe rëndësia e së cilës do të jetë e madhe edhe për zhvillimin ekonomik të Kosovës, rritës së eksportit e formave të tjera", tha Agim Shahini.

“Kjo autostradë të shërbej edhe për eksport të prodhimeve kosovare e jo vetëm për import të prodhımeve të huaja",tha Shahini.

Kryetarı i Aleancës Kosovare të Bizneseve, kërkoi që të konsumohen sa më shumë prodhimet vendore me qëllim të ngritjes së standardit jetësor. Nga Prizereni Shahini kërkoi  nga institucionet që të bëjnë reforma të poltikave në mënyrë që prodhuesit të jenë të barabartë me importuesit e jashtëm.

Sipas tij mbi 4 milionë vizitorë po shijojnë prodhimet e “Javëve të Biznesit" të cilat janë ekspozuar në pesë shtetet ku jetojnë shqiptarët.

Nga ana tjetër Ramadan Muja, kryetar i  Komunës së Prizrenit, tha se se edhe si kryetar dhe qytetarë i Prizrenit, i preferon qytetarëve të të gjithë Kosovës që të konsumojnë prodhime vendëseö sepse ato janë të sigurta.

“Jemi duke rrugtuar drejt arritjes së qëllimit që të rritet edhe eksporti i prodhimeve vendore", tha Muja. Sipas tij në Kosovë importohet nga shtete tjera, por nuk dihet përmbajtja e prodhimeve që konsumohen.

Ai premtoi subvencione për veprimtarit prodhuese si nga komuna po ashtu edhe nga qeveria në mënyrë që të rritet edhe standardi jetësor jo vetëm në Komunën e Prizrenit, por në tërë Kosovën.

Karnevali “Javët e Biznesit Kosovar 2013” me 27 nëntor mbahet në Pejë, me 29 nëntor në Mitrovicë  dhe do të vazhdoj gjatë gjithë javëve nëpër tërë Kosovën dhe më gjerë deri më datën 26 dhjetor 2013.